الولادة الطبيعية أم القيصرية؟

القيصرى أحسن ولا الطبيعى؟ فكرة بتفضل معانا من اول ما نعرف اننا حامل لغاية الولادة .. لا لا ديه من ساعت لما نتجوز واحنا فى دماغنا الفكرة دية! بصى يا ست الكل ... ما فيش حاجة انهى احسن, فيه حاجة اسمها انا حالتى وحالة النونو بتاعى احسن ليها ايه؟ فى الاول لازم نعرف الفرق بين الاثنين: الولادة الطبيعية Normal Vaginal Delivery: من اسمها ولادة طبيعية يعنى دي اللى ربنا خلقها وعملها من ايام ماما حواء وبابا ادم . هى ان الست وهى فى الشهر التاسع يجلها الآلام كده زى آلام البريود بس بتبقى اصعب حبة او حبتين ثلاثة يعني, وتستمر فترة حوالى 8-12 ساعة لو اول ولادة (بكرية) وبتقل الفترة مع كتر عدد الولادات وتنتهى بنزول اجمل الحبايب النونو بتاعنا. طبعا ربنا بيدينا معونة ومساندة كبيرة فى الفترة ديه وكمان بيدربنا على آلام الولادة دي من نهاية الشهر الثامن بشوية مغص والآلام كده مشابهه شوية لآلام الولادة بنسميها آلام ولادة كاذبة بتدربنا وتدرب النونو على وضع الولادة ازاى . يعنى فيها الام يا دكتور؟ ايوة فيها بس بجد بتتنسي خالص بعد الولادة وحاليا فى كتير من الطرق اللى بنستخدمها في انها تخفف الآلام دي زى الولادة بدون الام او بعض انواع المهدات وادوية التخدير . طبعا مش بنقرر طبيعى غير لما يكون دنيا الام والطفل متظبطه ووضع الولادة بخير. طيب والقيصرية Cesarean (“C”) Section : بصى القيصرية هى ولادة الطفل من خلال جرح بسيط كده فى البطن . طبعا فيها منها اكتر من نوع وطريقة واسلوب حسب وضع الطفل وعدد مرات الولادة وطلب الام طبعا اللى بيولد مرة قيصرية فى الأغلب هتبقى كل الولادات اللي بعديها قيصرية . القيصرية فيها الام .. ايوة فيها آلام طبعا بعد الولادة بناخدلها مسكنات والآلام دي علشان طبيعة العملية من فتح طبقات البطن الكتير نيجى بقى للاشاعة المنتشرة انها بتعمل كرش او ترهلات فى البطن بعد الولادة .. هنرد ونقولك لو القيصرية اتعملت بصورة تجميلية مع ارجاع واصلاح طبقات البطن كلها والعضلات لطبيعتها الاولى قبل الولادة مع شوية تمارين وتعليمات بعد الولادة مش هتحصل الترهلات دي. التخدير Anaesthesia : احنا بالتنسيق مع طبيب التخدير بنختار الطريقة المناسبة للتخدير مع الولادة، فى الأغلب بختار التخدير النصفى, وده بيكون عن طريق شكه بسيطة فى الضهر لحقن المادة المخدرة . رغم انها شكه بسيطة بس اللى بتخاف منها نتيجة كلام الناس اللى مخوفنا بناخد حقنة قبل الشكة دي مش بنحس بيها خالص. بعد الكلام الكتير ده اولد ايه قولى ؟ طبعا لازم دكتور النساء حسب حالة الأم والطفل بيحدد نوع وطبيعة الولادة . بس لو الطبيعى والقيصرى متاح طبعا اختارى الطبيعى. زى ما بنقول وهنقول وهنفصل نقول الطبيعى عملية فسيولجية طبيعية خلقها ربنا بدون اى تدخل مننا وافضل دكتور نساء فى الولادة الطبيعى هو الطفل نفسه. هو اللى عارف بيلف ازاى وبينزل ازاى. طبيب النسا متابع لحكمة ربنا بيساعد الام وحاليا بيتحكم فى آلام الأم بمخدرات وحقن معينة .