أسئلة مهمة عن الاكتئاب

اسئلة مهمة عن الإكتئاب س: اعرف منين ان قريبى أو صديقى مكتئب؟ - هتلاحظ إنه بقى مهموم و متضايق معظم الوقت, بدأ ينعزل عن الناس, مش مستمتع بخروجاتكم و نشاطتكم زى الاول، بسبب او بدون سبب. - كلامه بقى قليل، مبقاش منتظم فى الدراسة او الشغل و فقد حماسه لعمل اى شىء - فقد شهيته و نومه قل او يمكن زاد و بقى بيتهرب بالنوم من الحياة س:طب اعمل ايه و اقدر اساعده ازاى؟ - اسمع له, طمنه و حسسه انه مش لوحده و إنك هتسانده و الاهم من ده انك تطلب المساعدة من متخصص قبل فوات الأوان س: هو اى حد متضايق شوية يبقى عنده اكتئاب؟ - لا, المزاج الاكتئابى ده عرض مش مرض يعنى ممكن يكون متضايق اه بس معندوش مرض يستدعى القلق او عنده حاجة و محتاجة مساعدة ف اقرب وقت س: و انا هعرف منين بقى هو عرض ولا مرض؟ - مش مطلوب منك طبعا تشخيص, امال احنا لازمتنا ايه، لما تشك ف اى عرض م الاعراض اللى قولناها فوق توجه لاقرب طبيب نفسى و هو هيقوم باللازم و يطمنك س: طيب هو ساعات بيجيب سيرة الانتحار بس بهزار يعنى، اهزر معاه عادى ولا ايه؟ - كون انه ذكر سيرة الانتحار حتى لو على سبيل الهزار فده شىء لا يستهان بيه س: يعنى ده مش نقص ايمان و تدين؟ - الافكار الانتحارية بتيجى لمريض الاكتئاب غضب عنه بسبب نقص معين فى بعض المواد الكيميائية فى خلايا المخ، الشخص ده مش محتاج نقد وعظ قاسى و لكن تفهم و مساعدة… الجانب الدينى بيساعد المريض جدا و لكن مش لوحده، لازم يكون فى عوامل علاجية تانية الى جانب تقوية الجانب الدينى للشخص لان ف الاول و ف الاخر ده مرض و ربنا خلق له العلاج س: طب اقوله ايه ساعتها؟ - وجهه لاقرب طبيب نفسى و متنساش ( و من أحياها فكانما أحيا الناس جميعا)